الاسكريبت الأسبوعي
يوم الاثنين 10 / 10 / 2022
( .. كتب / أ / محمد خالد .. )
جريدة تيم على ناصية الشعر ..
الإسم: هاجر محمد عرفه
الموهبة: الكتابة، الإلقاء
السن: ٢٣
"قال إيه المرأة مش ملزمه!"
-------------------------•••»
مساء الخير،صباح الخير حسب التوقيت
ولإننا مسلمين ف السلام عليكم ورحمة الله وبركاته،
بصوا الموضوع دا بالذات مش هعمل مقدمة أو أي تمهيدات، أصله
هو بصراحه مش محتاج هو ممهد نفسه بنفسه...يلا بينا؛ يلا بييينا...
من فترة كدا وأنا بقلب في التايم لاين كالعادة، لقيت خير اللهم اجعله خير يارب،
بوستااااات كتيييير بتتكلم عن " المرأة مش ملزمة" قال إيه يا أوختشي المرأة مش ملزمة تربي
ولا ترضع ولا تشوف احتياجات جوزها؛
اللي هو يعني حضراتكوا عايزين إيه يعني بردوا،
لا ما هو أنا عايزة أفهم يعني أنا كبنت زهقت من حوارات الستات بصراحه.
لا ويسلام بقى لو جيت قولت "المرأة في الإسلام"
اللي هو أول ما هنسمع الجملة، أول حاجة هتيجي في بالنا كلنا " الرجال قوّامون على النساء"...
لكن حُط نقطة من أول السطر كدا، وتعالى أقولك ونفهم سوا هل المرأة ملزمة ولا مش ملزمة،
ويمكن تطلع اسكتش كبير؛ أصل الستات دول حوارتهم كتير أوي.....
• الحقيقة اللي الكل لازم يعرفها؛ إن الراجل والست في الإسلام زي بعض؛ هنا هتحس بالدهشة شوية،
وتقولي إنتي بتقولي إيه ياست إنتي! مش لسه قايلة الرجال قوّامون على النساء؛؟
= هقولك ساعتها اهدى وقول هديت واسمعني للآخر وابقى احكم....
هو فعلًا "الرجال قوّامون على النساء" لكن في حتة الأجر والثواب، الراجل زي الست بل؛
ويمكن تكون أفضل منه كمان، وكلامي دا بدليل مش جهجوني كدا لأ؛
سيدنا النبي (صل الله عليه وسلم) قال في حديث أخرجه أبو داوود "إنما النساء شقائق الرجال" الله!!
دا الست زي الراجل فعلًا!؛ لااا ومش بس زيه دي كمان ليها إنّها تطلب حقها كمان؛
بس خلينا نتكلم بالمنطق كدا، العقل السليم بيقول إن كل واحد فينا له دور ووظيفة في حاجة معينه،
لما نقول بقى الراجل والست زي بعض في كل شيء، ويكون في مساواة زي ما بنسمع كدا؛
الحياة هيكون فيها خلل، الأمور مش هتمشي أصلاً، كل واحد له دوره في الدنيا،
لو قلبنا الموازين؛ يبقى مش هنعرف نعيش.
دلوقتي هتحس بلغبطة بسيطه كدا وممكن تحس إنك مش فاهم،
وعقلك يطرح عليَّ سؤال عزيزي القاريء ألا وهو: الله! أومال الرجال قوّامون إزاي طيب؟
= عزيزي القاريء أكيد مش هتفوتني دي "الرجال قوّامون" بس في حجات تانيه زي مثلًا:
قوة البُنيان، القدرة على تحمُّل المشاق الحياتيه في العمل وهكذا...
هتقوم جاي موقفني وتقولي ما في ستات بتعمل كل حاجه ويمكن أفضل كمان من الرجالة؟
= بردوا عزيزي القاريء هدخلك من ثغراتك، أصل أنا حالفة إني ألِّم الموضوع من كل ٱتجاه،
وهنا هيكون ردي عليك:
إن البنت أو الست أو المرأة، لما تتباهى بقوة جسدها، وإنها تقدر تتحمل زي الراجل،
أنا هنا هحط علامة تعجب! يعني اللي هو ملهاش تفسير فعليًّا غير إنك كنت بتغيّري
من الفطرة السليمة اللي ربنا خلقنا عليها، واللي لازم تكون متوفرة فيكِ كبنت؛ علشان إنتي بنت.
سؤال بس؛ إنتي مبسوطة إنك مسترجلة يعني ولا إيه مش فاهمة؟!
كلها علامات استفهام أصلاً، والبنات نفسهم مش لاقيين ليها إجابة،
علشان هما نفسهم مش فاهمين نفسهم أصلًا.
طيب في وسط الكلام ألاقي سؤال جاي: ماهو أصل الراجل بيخرج في سبيل الله،
وبيجاهد، ويحارب، وبيخرج للجمعه والجماعه، وبيزور المريض،
وكل دا له ثواب عظيم، وكل دا المرأة مش بتعمله؟
= طب ركز معايا هنا كدا وتعالى أما أحكيلك حكاية جميلة أوي عن الصحابية "أسماء بنت يزيد"
وعُذرًا هنا هكمل كلامي بالفُصحى:
" أتت الصحابيه "أسماء بنت يزيد" إلى النبي "صل الله عليه وسلم" وهو بين أصحابه فقالت:
بأبي أنت وأمي؛ إني وافدة النساء إليكَ، وأُعلِّم نفسي لك الفداء،
أَمَا إنَّه ما من ٱمرأةٍ كائنةٍ في شرقٍ ولا غربٍ سمعت بمخرجي هذا،
أو لم تسمع إلّا وهي على مثلِ رأيي؛
إن الله بعثك بالحق على الرجال، والنساء؛ فآمنّا بك، وَ بِإلٰهِكَ الذي أرسلك،
وإنا معشر النساء محصورات مقصورات؛ قواعد بيوتكم،
ومقضى شهواتكم، وحاملات أولادكم، وإنكم معاشر الرجال؛ فُضْلِّتم علينا بالجمعة،والجماعات،
وعيادةِ المرضى،وشهود الجنائز، والحج بعد الحج، وأفضل من ذلك؛ الجهاد في سبيل الله،
وإن الرجل منكم إذا خرج حاجًّا أو معتمرًا؛ نرعى لكم أولادكم، فما نُشارككم في الأجر يارسول الله؟
التفت النبي " صل الله عليه وسلم" إلى أصحابه بوجهه كله؛ ثم قال:
هل سمعتم مقالةَ ٱمرأةٍ قطُ أحسنَ من مسألتها في أمر دينها من هذه؟
قالوا: بلى يارسول الله؛ فالتفت إليها النبي صل الله عليه وسلم؛ ثم قال لها: ٱنصرفي أيتها المرأة،
وأَعلِِمي مَن خلفكِ من النساء أنَّ حُسن تبعُّل إحداكنَّ لزوجها، وطلبها مرضاته،
وإتباعها موافقته تعدلُ ذلك كله__
- خلصت القصة؛ نركز كدا مع بعض في آخر كلمتين في الحديث كدا:
"حُسن تبعُّل إحداكن زوجها، وطلبها مرضاته، وإتباعها موافقته؛ تعدلُ ذلك كله"....
متخيلين كدا الجماعه الفيمنسيت، والشوية بتوع المساواة، والفئة الأخرى اللي بتقول المرأة مش ملزمة؛!
مجرد ما أطعتِ زوجك؛ هيكون ليكي ثواب وأجر الأعمال التي لا يقدر عليها غير الرجال،
بالله أي كرم هذا، بالله بس قولولي: في فضل أعظم من كدا؟!
= اللي عايزة أقوله؛ إن لو الست زي الراجل، وإنهم متساويين في كل حاجه،
وإن الست مش مُلزمة زي ما بيقولوا؛ الكون موازيينه هتتشقلب، ومش هيكون سوي،
وهنلاقي كوارث بالكوم؛ هتقولي ليه؟ هقولك؛ علشان كل واحد فينا له دوره في أمور معينه،
ولو حصل وأنا وإنت تعدينا حدود الأدوار المفروضة علينا دي؛
المعادلة الكونيه هتكون فاشله بكل المقاييس، والتساوي بيكون تساوي في الأجر والثواب.
استنوا الجزء التاني.........
سلام.
بقلم/ هاجر محمد عرفه
#جريدة تيم على ناصية الشعر
تعليقات
إرسال تعليق