حوار وقصيدة ..



حوار مع مؤسسة كيان تيم على ناصية الشعر _ الشاعرة آية إسماعيل


_نتعرف بحضرتك ؟


آية إسماعيل محمد 
عندي ٢٠ سنة في سنة تانية كلية الدراسات الإسلامية والعربية جامعة الأزهر.


_من امتى اكتشفتي موهبة الكتابة ؟

من حوالي ٧ سنين في المدرسة بس كنت بكتب لنفسي وقتها ومكنتش بعرض كتابتي على حد 
ماعدا شخص واحد وهو استاذي في اللغة العربية وكان دايما بيدعمني وفخور ب أي حاجة بكتبها 
وطبعا كنت حاسة أنها ضعيفة بالنسبة للشعراء اللى كنت بسمع لهم لحد ما بالوقت بقيت بسمع وأقرأ 
كتير واتطورت في موضوع الوزن والقافية والكتابة بشكل عام .\



_مين مثلك الأعلى ؟

لو هقول مثلي الأعلى في الحياة دلوقتي ف أكيد هقول أمي لأن دي أقل كلمة تتقال في حقها 
أما لو مثلي الأعلى في كتابة الشعر ف هيكون بابا لأني وارثة حب الشعر منه هو 
ومعايا النوت اللى كان بيكتب فيها زمان رغم أنها قديمة جدا جدا إلا أنها أغلى عندي من أي شيئ .



_تنصحي باقي الشعراء بإيه ؟

انصحهم ميكونش في يأس عندهم أبدا ويأمنوا بنفسهم ويسمعوا  شعر كتير طبعا ويقرأوا كتير 
علشان يطوروا من نفسهم اكتر من الناس اللى بحب اقرألهم 
الشاعر مصطفى ناصر والشاعر محمد ابراهيم والشاعر عمرو حسن 
أما من الناس القديمة يبقى الأبنودي وصلاح جاهين .


_كلمينا عن تيم على ناصية الشعر اللى تعتبري مؤسسة كيانه ؟

تيم على ناصية الشعر في ناس جميلة جدا وموهوبة وعندها طموح بتسعى ليه 
والتيم كله طبعا بيساعد بعضه وبيدعم بعضه طبعا التيم كبر وبقا لكل محافظة التيم بتاعها 
ودا طبعا بفضل جهد الشاعر محمد خالد وتركيزه الدايم مع الكيان 
والتيم قريب جدا هيبقى ليه حفلات على أرض الواقع في المعز وفي كل مكان بإذن الله .


_مين أكتر حد بيدعمك من اللى حواليكي ؟

اكتر حد بيدعمني اهلي وتحديدا ماما طبعا اللى عمرها ما سابت أي حفلة ليا 
ودايما موجوده معايا طول الوقت وطبعا ناس كتير من صحابي بيحبو كتابتي جدا وبيدعموني خطوة بخطوة 
والشاعر محمد خالد من اكتر الناس اللى بتدعمني خطوة ب خطوة وهو نعم الصديق حقيقي .


_ممكن قصيدة من كتابتك ؟

اكيد ممكن طبعا قصيدة : كيفك ياصاحبى 


كيفك يا صاحبى بعد طول غيبة
مش يوم حلمنا نبقى للشبية
الدنيا داهية وجتها مية خيبة
علشان بتوهم قلبنا بالحب 
وان يوم حلمنا بالخطاوي نشِب
ترجع تكسّر حلمنا تانى 
كام مره نضحك واحنا بنعاني  

القصد اقولك ليه بقيت جاني 
وبقيت مفارق يعني دون أسباب
كان كل أملي انى الآقى عتاب 
على شيئ مظنش إنه كان عله
الفرقه واضحة وباينة فى النية
كُنت الحمام وانا كنت لِيك غيّة
لو مهما طيرت العوده كات ليا
ف ازاى حكمت الهجر دون رَجعه
وازاى صبحت الأزمه جوايا

العِشْرَة هانت والسنين واجعة
مش من يومين قد كنت ويايا
مش وقت حزنك كنت حضن حويط
مش كنت تسمع شِعرى بالتنهيد 
مش وقت خوفك كنت ليك البيت 
مش يوم حزنت فى خوفى على زعلك 
مش يوم سافرت وقولت هرجع لك 
مش كنت تحزن ياما واسمع لك
مش كنت اخوك ؟ فى الشدة فهمني
معقوله يعنى بتنتقم مني !
الضربة منك كافرة بتعلم
وحياة سنين العِشرة بتألم
وبكيت حروفى بالدموع اشعار 
ده انا كنت ضلك يعنى ليل ونهار

ياما قسمنا اللقمة بالضحكة
مش كنت دايما جنبى فى الدِّكة
وحكينا حلم فى خطوه م السكة 
مش كان كلامنا تملي فيه احنا
وان يوم نخبي الحزن يكشفنا
الكسره منك صعبه على قلبي 
مانا كنت بحزن ياما وبخبي
والهم أصبح ليا كما صاحبي

الهم صاحب جدع عكسك تمام يعني
منا قلبى ياما اتلدع من غير ما تسمعني 
صدقني .. عادى يا صاحبى وبسيطة
هجعل وجودك يعنى كالحيطة
وهواسي قلبي ع السنين الكدب
وياصاحبى هحلم 
برضوا عادى واشب 
من غير ما آمن تانى للصُحْبة
وهشوف صحابى تملى كالغربا 
الدرس اصعب من سواد الليل 
سِم الكلام دوق لقلبي الويل
وفهمت منه ان البشر ملاعيين 
وحياه دموع القلب مش باقيين 
الكل ماشي وساعته يوم جاية
زارعين رحيلهم جرح فى النيه 
سايبين ندوب فى الذكرى والأيام 
سايبين أماكن شاهدة ع الاحزان
سايبين قصايد تحكى عن خذلان 
سايبين فى جوفنا علامة مش ماشيه 
رافعين شعار ان البشر ماشية ...
__________
#آية_إسماعيل 
#كيفك ياصاحبي


تعليقات

إرسال تعليق

المشاركات الشائعة من هذه المدونة

جريدة تيم على ناصية الشعر الأسبوعية

صورة
  جريدة تيم على ناصية الشعر الأسبوعية   الفائزين بالمركز الاول فى التيم وبعض الأعمال الفائزة فى المجالات المختلفة مجال الخواطر    أسماء محمد عبد الرحمن ستتذكرني ولو افترقنا ألف عام، ستتذكرني بكلمة اعتدت سماعها مني، أو بوقت معين تعودنا الحديث به، ستتذكرني حين ترى النجوم ليلًا، أو حين تمرُّ عليك ليلة باردة تشعرك بالوحدة، ستتذكرني دون قصد منك لأكثر من سبب، وبأكثر من طريقة، لتعلم ماذا خسرت، لقد خسرت قلب أحبك بصدق دون أن ينتظر منك شيء سوى الحب، ولكنك لا تعرف ماذا يعني الحب الحقيقي، فقط لم تفعل شيء سوى أنك علقتني بك، ثم طرقتني دون أن تخبرني عن السبب، أتذكر تلك الليلة، لقد انتظرتك فيها كثيرًا لكنك لم تعد أو تلتفتَ حتى، حينها سمعت صوت قلبي يتهشم كقطع الزجاج،لقد وثقت بك أنا وقلبي، ولكن قطعت عهدًا على نفسي في ذلك اليوم بأنني لن أثق بك مرة أخرى ولن أنتظرك ولو كنت آخر البشر، لن تعود مكانتك في قلبي كما كانت حتى ولو كان ينبض لك، لقد تحملت الكثير منك، بالرغم من أنني حاربت وفعلت الكثير والكثير من أجلك، ولكنك في النهاية لم تحارب من اجلي بل حاربتني أنا وقلبي. مجال شعر العامية   خالد أشرف "جملة شريد
قراءة المزيد
صورة
  تيم على ناصية الشعر       " مُحررة تيم على ناصية الشِعر تحاور الكاتبة الصاعدة رحمة حمد " حوار   : كاري الغزالي وماذا عن أحلامك؟   أتظن أنها لها وقتٌ خاص كي تعمل عليها؟ مَن الفاسد الذي قال أنكَ لا تنجح عندما تعمل على هدفان في آنٍ واحد؟   الثقة بالله والنفس إذا اجتمعَ في قلبٍ، استطاع العقل فعل المعجزات   . "   رحمة حمد معوض، عشرون عامًا، طالبة في معهد التمريض، مِن محافظة الفيوم، ابنة مركز سنورس . كاتبة ولا تجد نفسها إلا في الكتابة، وليس نوع واحد فقط بل كل أنواعها الخواطر، والاسكريبتات، والمقالات، والنصوص، والشِعر؛ حتى أصبَحت الكتابة بيتها الوحيد الذي تبوح لهُ بكل ما بداخلها؛ سواء كان فرح أو حزن أو غيره   .   وقالت الكاتبة رحمة حمد أنَ بدايتها كانت لطيفة وهي منذ  اِكتشفت نفسها عام ٢٠٢٠، وفي بداية الأمر كانت تكتب لذاتِها، ولا أحد يرى كتاباتِها لأنها كانت لا تعلم ماذا تفعل، وهل كتباتها ستنال الإعجاب أم لا؟ وبدأت ثقتها بنفسها تقِّل؛ ثم بعد ذلك حدث لها بعض المواقف الشاقة في حياتِها فَبدأت تبحث عما بداخلها لتثبت لذاتِها أنها تستطيع، وبدأت تلتحق ببعض المجموعات التعليمية في بداي
قراءة المزيد
صورة
  تيم على ناصية الشعر       "  مُحررة تيم على ناصية الشِعر تحاور الكاتبة الصاعدة رضوى عبد الشافي  " حوار   : شيماء رأفت   السلام عليكم ورحمة الله وبركاته .   نقدم لكم كاتبه جديدة نوَّد التعرُف عليها وعن بداية مسيرتها .   في البداية نوَّد التعرُف على بعض المعلومات عنكِ .   الإسم : رضوى عبد الشافي رمضان السن : 24 المحافظة  :  الفيوم اللقب : (  سيدة القلم ) الموهبة  : الكتابه ل أكثر من نوع مثل ( خواطر _ شعر _ روايات _ اسكربتات ) الهواية  : ال قراءة والكتابه . __________   في بداية لقائنا نوَّد الترحِيب بِك معنا بجريدة تيم  *( علي ناصية الشعر )*.   والآن سنطرح عليكِ في هذا الحوار بعض الأسئلة . __________   _ أيمكنكِ التعريف عن نفسك في بضع أسطر؟   أنا رضوي شخص يفضل الكتابه في كافة أموره أكثر من التلفظ ( شخصيه عنيده ). ___________________   _ متى بدأتِ مسيرتُكِ؟   أول مره كتبت فيها كان ف الصف الثاني الثانوي ولكن كان الأمر مجرد كتابه في دفتري الخاص ليس إلا. ______________   _ من هو أكبر الداعمين والمُشجعين لكِ بهذا المجال؟   أمي بارك الله لي فيها وأطال في عمرها وزوجي أدامه الله لي.
قراءة المزيد